Buodi Meeri tendi Lotodiedi 5 bu paabu

Buodi Kominno Meeri Fiinba LONPO  leni opuoliŋuani den tieni li binli 2020 cicili taancianli, lani ntie ciyendo ŋmaalo yua n jagi ne odana 17 daali.

Laa taanli mayuciama den tie ki waani li binli yaali n jiidi lan tie 2019 yaa tuona n cuoncuoni maama leni 2020 ne mo ya binli tuona n baa ŋoa-ŋoadi maama. 

Bi den lebini ki taani laa taanli leni badito yu ya mayuli nden tie ki tieni ti lotodiedi po mi todima ke laa todima mo den tie tiadi buolu buolu (Mobileeri bonbi 5, iduani 50 ;  imadimaanduani, duani 5 ; i yianduani duani 5 ; leni a yiama biatudikaaga) laa paabu kuli ligi taanma ban fii miliyon piigan yendo leni tudakobiga n piilie ntuda taa.

Yin bandi ke laa todima tie Buodi lotodiedi yaadi ya coali ntie lotodiedi 5 yeni yaapoe. Buodi lotola kuli pala den mangi ke bi tieni mi maama bi siiga yendo Juma CONBIANU ñoabunni ki baa jaandi Buodi kominno liiga yaaba leni ban tieni ya ŋanbicianli ayiama todima po, bi go pugini ki miadi ke yendo yendo kuli n diidi ki taa Buodi Kominno taafuuli lan fidi ki todi bi niba laafialo leni bi yema ŋamu po.

Laa badu nden pia li mayuli maama po, Buodi Kominno tundikaaba ban yi yaaba Konseyenba yeni kuli, ki taani ijaanbuoli liiga yaaba, leni baalo tuonsoandiedi yaadi nye Buodi kominnonni kuli yendo yendo den moandi ke li tua onunbunne.

Juma CONBIANU den pugini ki waani ke bi jaandi Buodi Meero leni  wan baa ya nunnoalima ki teni ti tiadi yaadi n baa fidi ki todi ba ban fidi ki ya tuuni bi niba laafialo po yeni.

Lanwani Buodi Meero Fiinba Sulien LONPO den taa mi maama ki yedi ke wani leni opuoliŋuani kuli taa li jagili ki baa ya yegi leni yaa cagili kuli n li puni li yuli Buodi leni ogaanilindima nimiana yema ŋamu po.

Lanwani ban ti taa li binli 2019 tuonli n cuoni maama ki waani, li den doagidi cain ke bi soani ke li ŋani, kelima yaali ntie ti lotodiedi po, bi sua ke ban den bili ke bi baa maa ya lotodietaaditi siiga bondilie wani gbeni cain, lani ntie Fantu leni Tancagibuli ya lotodiedi, yengu bebe n da ye li tuonli yuli po, lani ntie Jinkoli ya lotodiegu.

Yin bandi ke laa badu den tua bi niba kuli n den kaa ki guu yaala ke li waagi ki bua ki bandi lan gaa gaa maama ke ban yi yua Adama SANÑA, yua moko n tie Buodi maamaabiga ki ye Ameeriki po den tieni bu paabu Buodi kominno po ke Meeri mo nan den yie ke o kan ga laa paabu.

Lankani, Meeri den taa mi maama ki waani ke li tie ti laabaali-poadi leni ilaabaali golinma nteni ke bi niba maadi laa maama. Lan yaaka, li pundi bi niba n bandi ke SANÑA Adama yua n puni bu paabu yeni tie onataanpo yo, ki go pugini mo, yuakuli bani ke Buodi kominno se ke li pa ki bua ki mo ntieni wan fidi maama kuli ki mo n finde, lani daa, li nan baa ga lede wan baa bu paabu ki nan go yie bu mo, ba lan tie ke laa paabu ñani naani kuli obi baa gaa, ki da ji bagi o naataanu mo ya paabu !

Lanwani o waani ke lan ga maama tie ke bu paabu yeni den tie ti lotodiedi poe, ki nan sua ti lodiedi mo ji ye moala Kominni ya yelinne, lanwani, lan bi naaninni maama tie ke lan tie yaa paabu buolu kuli n cua kominni yeli po, li pundi kominni niba n bogini badu lipo ki waani bu paabu nñani naani leni bun cua yaaba, bi yaala ya yeli po.

Meeri pugini ki waani ke wani oba hali ke o daa tua Meeri yogunu puoli po, oden taa li jagili ki baa todi Kominni leni mi ñima, ama oden gbee ki teni li bonla kuli Meeri LONPO Paanba nuunne ke wan leni okominno liiga yaaba nbogini lan baa ŋoaŋoadi maama.

Osuagi ki yedi ke wanwani nua ke moala bi niba pundi ki yaa faami ki gagidi  ilaabaali leni iyi, ki yen buali bi yula yin ña naani. O den taa nannanli nani abonpiena n ñani dinla ya tuonsoantiagu ke bi yi gu « Feesibuuki » yeni, o yedi ke onua ke bi niba yabi ki tendi lienni i laabaali-golimi yii n ki pia ñiali kaa pia saala mo, kelima o sua ke ilaabaali yii n kan cuani yaala n ŋani kaa tie ki biidi itagiŋami bebe yeni yabi ki ña laanne.

Oyedi ke li pia lipaboanli oya tiadi ban den ludi ki yini maama ki baa waani o ke laa daali fii faama ti tiadi kpendi kominni yeli po.

Lanwani Meeri miadi Buodi bonjala leni li li bonpola kuli ntaani leni o wan kaa li bali po ya yogunu ban moa Buodi tinga findima po.

O waani ke Buodi diema tie yaama nye leni li muali mi bila findima po, lanwani li ŋani ke yuakuli n tieni ania ki kuani o nii laa mualinne ki cedi yaali n kan ŋanbi maama.

Yaali ntie ibuali yii nden tie ke bi niba yabi ki buali naani Meeri wangi odiema niba otuona n cuoni maama, Meeri yedi ke laa pundi buali moko, ke bi ya ta nannanli ciluoba yua n pendi yeni o piilie ndana taa daali o den taani kominni niba ki waani ba otuona ncuoncuoni maama ya yogunu npendi po. Li pundi bi niba n bandi ke Buodi tie Bulicina kominninba yaaba kuli n kpia bogini li daali ki baa waani bi tuona n cuoni maama siiga yaaba yendo. Li tie ke Meeri fidi ki tieni laa daale, lani nteni ke Ban yi ya boginli PDDG yaali n ye Kominninba findima po yeni den puni Buodi Kominno ku biagu (loli) 4×4.

Meeri majuodikaama tie ke omiadi yuakuli n tieni mi yanfuoma ki ya lingi yaali n baa todi Buodi tinga nfindi ki ya ye leni mi yanduanma bebe ki cedi yaali nsieni kuli.

Yua nteni i naa laabaali tie AIB Taapua

Mi soaginma mo tie Yentenma OUOBA ke o ye Collectivités infos

Written by 

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *