Isani ŋanbima tuona cilima Ugulimu diemanni

Isani yii ya bana taanma n pundi cilodajena 33 leni dajenyenli boagidima ŋanbima tuona cilima

Ciyendo ŋmaalo yua n jagi ne, o danpiiga daali, yuan tie Konseyi resiyonali « lani ntie Ugulimu tinbuona taanma cenli ŋamu tuonsoandiegu » liiga yua, Paalipugini LONPO den pundi Siedugu dogu yu n ye Manni kominno nni, lani ntie Ñaña purovensonni ki luodi ki puni usanu ban cili isani tuona Ñaña leni Komoanjaali purovensinbanni.

Yin bandi ke laa sani foagimu taanma pundi cilodajena 33 leni boagidima. Li jagili leni li yantiali nŋani maama po, ku niligu den ñani hali lan pundi maama ki baa waani bi pamanli laa sani tuonli po.

Nani Konseyi resiyonali yantiali ntie ki moa leni mi luoma leni atuona poadima yeni, bi bili ke laa sani ŋanbima pundi ki pugini a tuona ugulimu niba po, ki ban cie mo, Komoanjaali leni Ñaña diema po, kelima bi baa teni yuakuli nkuani o nuu laa tuona nni.

Lanwani yaali ntie cilodajena 33 yeni tuona cilima po, bi da kpia puni ban cili ki ŋanbi ya sanu n baa cili  Siedugu dogunni ki tagini ki poandi Dialindi dogunni ki ban pundi Gongodigu ya dogu yo. Laa sanu ya foagimu baa ya tie cilodajena 6 leni boagidime.

Yin yaa bani ke laa sani ŋanbima ŋoa ban yi ya bogincianli PSAE, yaali ya jagili yaa mayuli n tie ki moa ki kaani li baali leni li bonjekaala ugulimu diemanni ya tafuulinne, laa bogincianli todima n ñani naani mo tie ban yii ya tuonsoancagili (AFD), yaali n tie Firansi n kaani yaa cagili mi findima po yeni yaa kani ki taani leni Bulicina diema mani miba mo ntodi yaala ugulimu findima po ya kani.

Laa sani tuonli cenli ŋamu diidima po, Konseyi Resiyonali wani oba n baa muubi onuunni ki taani leni ban yii ya cagili Helvetas yua n ye mi findima po yeni ya todima.

Lanwani ya sanu n baa tagini Siedugu ki ña Dialindi ki ban tuoni Gongodigu yeni tuona kuli taanma baa fii miliyon 84 leni tudakobiga nkuumu kobimu.

Konseyi Resiyonali liiga yua Paalipugini LOMPO teni li tuonli ban yi ya tuonsoandiedi SAMNI leni CONFORT, bani yaaba n tie isani tuonsoanbanda yeni ki go mia ba ban moandi ki soani ya tuonli n pia mi ñuadima ki go baa waagi mo. O go pugini ki mia atinbuona niba mo, yendo yendo kuli n kuani o nii laa tuonanni ke lan teni isani tuona ncili ŋama ki go ban juodi ke li ŋani.

Yin bandi ke nani ban bua li tuonli n cuoni ŋama maama po, bi da den kpia bogini mi bangima yaali ntie a tuona npundi ki cuoni maama po. Laa bangima den tieni ciyendo odana luoba ki gedi odanpiiga daali Bogande dogunni, yaa caga nden baa laa bangima den tie tuonsoancaga piiga yo.

Yua n teni ilaabaali tie Iliasi Haaro, ke o ye u gulimu Konseyi Resiyonali laabaali tenma cagilinni

Written by 

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *