LOAGIBU KOMINNI (MEERI) TIENI NANI LI BALIMAAMA N BILI KE GOBIDIKOA KULI PUNDI KI TIENI MAAMA WAN YE YAABA LIIGA LENI NITOABA NFIDI KI BANDI O TUONA CENLI FUULI

Li ya tie nani li balimaama yaama ntuugi leni Baalo n boagidi o paalu ki teni a tinbuona tili ban yi yaali (CGCT) nbili maama, liigayua n kali ki waani wan taa bi niba ntaani ki teni o ya bali ki tuuni bi findima po maama leni ya fuuli tie mi gobidimoanma ñiana siiga yenli.
Laa balimaama tilinni, li bili ke li tie tilade ban gandi ki teni yua wan tugi kominni bali bi Resiyon bali kuli po, wan yen baa uyogunu ki togidi bi niba wan kubi bi ligi ki tuuni bi diema findima po maama.
Li tie yene ke Loagibu kominni yua moko n ye ku nungu diema (Resiyon) nni nani kominni bontoaba yeni ya Meero Koanjoa YUONLI den tieni li ŋaniali ki baa kuani laa ñoabonli li binli 2019 piigancilie odana piilie n danyeli daali.
Koanjoa YUONLI gobidi Loagibu Meeri ki cili li binli 2016 ki yaa ca 2019.
Ti ya ŋoadi o togida fuuli, o waani ke Loagibu meerii yaaba soani tuona boncianla yaa n tuugi leni tuoncaga boncianla cenli ŋamu po. Ban taa ya ligi ki soani mo tie leni Kominni wani oba ya piama ki taani leni o todikaaba ntodi yaala.

Ban kuani iligi laa tuoncaganni maama nne :
– Ucogu findima po : Miliyon 191 leni tuda kobiga npiinii n kobiyia nkuumuluoba
– Li laafiali po : Miliyon 4 leni piiluoba ntudalie
– Mi yema ŋamu, mi ñima leni ku ŋangu po :
Miliyon 221 leni piiluoba ntudanii nkobitaa n piilie n kumuluoba
– Ti yandi laafiali po : Miliyon 53 leni tudakobiga npiimu nkobiluoba n piita nkumunii
– Ukpendu tuona po : Miliyon 71 leni tudayia n kobinaa npiiyia nkumuuluoba
– Animiana jiginkaanma tuona fuuli po : Miliyon 4 leni tudakobiga n piinii ntudalie nkobiita nkuumuna.
– Bu kpaabu leni li yanwubili po :
Miliyon 59 leni tuda piilie nkobiluoba npiilie nkumulie
– Ti diedi leni Utaayienu tuona cenli ŋamu po :
Miliyon yendo leni tudakobiga npiiga ntudataa
– Ti tuonsoantiadi leni bontoala : miliyon 224 leni tuda piita ntudiyenli nkobiluoba npiita nkumulie

– Unuu tuona bangima cenli ŋamu po :
Miliyon 12 leni tudakobiga npiilele ntudayia
– Yaaba n tuuni mi findima tuona suagima po leni mi gobidiŋanma tuonli cenliŋamu po : Miliyon 15 leni tudakobiga npiilie ntudalele n kobitaa npiilie n kuumulele

Ban soani ya tuona ke li tie Loagibu diema (kominni) findima po ligi taanma pundi Miliyon 860 leni tudakobiga npiilie ntudamuu nkobilie npiimuu nkuumuna.


Yaa niba nden kali laa taanli kani, ki cengi Meeri leni o tuonsoanlieba ke bi togidi bi tuona cenli maama fuuli hali ki ban gbeni yeni kuli den kadi ki waani ke bi soani ke li ŋani.
Li taanli juodima puoli Meeri den ta mi maama ki jaandi Loagibu kominni todikaaba lani ntie :
• DEPAC-A ;
• DEPAC-B ;
• FONDS ENFANTS ;
• FPDCT ;
• PACT ;
• PSAE,
• PNGT ;
• PCESA,
Ogo jaandi Baalo leni a tinjaana, a dojaana leni Kominni niba kuli leni ban taani ki kuani bi nii Kominni findima tuonanni maama.
Loagibu Meeri, Koanjoa Yuonli majuodikaamanni o den pugini ki yedi line:
« Li pundi yuakuli n tiadi ke Loagibu Kominni tie yua n da cili ke li nan daa waagi, oganu leni ojienu mo kuli gbie leni li saakpeli yaali n baa fidi ki findi kominni bila saala po.
Ama ki nan fidi ki je laa sakpeli ñuadi nan tie ke Kominni bijaba leni obisiaba kuli yendo yendo ya fii ki cuo bi lieba nuunni ki yie ti mayuodi leni ti yantiayuodi po yo.
O suagi ki yedi ke ki fidi ki baa ban taa ya ligi ya bianu ki soani yeni den tie yaali n ki tua faala, laa ligi kuama mo go li ŋoadini leni kominni cagili niba yendo yendo kuli ntieni ya ŋaniali po yo.
Ban bogini ya yantiali ke li tie Kominni findima saala po yeni tie niyendo yendo kuli n baa kuani onii yaala ya niinne, ki go pugini mo, li tie ban baa ya ŋoa ki diidi ki ŋanbidi ki pugidi pugidi yaala ke li ŋoa leni li bonla n lebidi ki ŋoa ya fuule.
Loagibu kominno pia li fuali, ti yandi leni piama boncianla yaama n bua ban diidi ma, ki kubi ma ki nan fidi ki je mi ñuadi saala po.”

Yentema Ouoba, collectivitesinfo.net

One thought on “LOAGIBU KOMINNI (MEERI) TIENI NANI LI BALIMAAMA N BILI KE GOBIDIKOA KULI PUNDI KI TIENI MAAMA WAN YE YAABA LIIGA LENI NITOABA NFIDI KI BANDI O TUONA CENLI FUULI”

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *